ខ. តួអង្គសុខុម៖ ជាមនុស្សមានចរិតភ្លើតភ្លើន ឆាប់ឈ្លក់វង្វេងនឹងទ្រព្យសម្បត្តិចូលចិត្តសប្បាយហ៊ឺហា ភ្លេចមិត្តភក្តិដែលធ្លាប់កម្សត់កម្រនឹងគ្នា តែជាមនុស្សអាចអប់រំណែនាំបាន។
ការប្រៀបធៀបតួអង្គ គឺជាការបង្ហាញលក្ខណៈ ល្អ អាក្រក់ កាច ស្ងួតដោយផ្តោតទៅលើរូបសម្បត្តិ ចរិតលក្ខណៈ សកម្មភាព របស់តួអង្គ ។
លំហាត់
ចូរអានរឿង ``ក្មេងកំព្រា`` រួចធ្វើការប្រៀបធៀបតួអង្គនិននិងគំនិត។
រឿង ក្មេងកំព្រា
មានបុរសពោះម៉ាយម្នាក់បកបរបរជ្រលក់អំបោះ។ បុរសនោះ រស់នៅជាមួយកូនប្រុសម្នាក់ និងក្មួយកំព្រាម្នាក់។ កូនប្រុសរបស់គាត់ឈ្មោះនិន ឯក្មួយប្រុសឈ្មោះគំនិត។ រាល់ពេលបុរសនោះលាយល័ខជ្រលក់អំបោះ គាត់តែងហៅនិន និងគំនិតមកក្បែរដើម្បីជួយហុចនេះ ហុចនោះឱ្យគាត់។ ជារឿយៗ និនតែងដោះសាថា រវល់រៀនសូត្រ ឬធ្វើនេះធ្វើនោះជានិច្ច ប៉ុន្តែគេគេចទៅដើរលេងជាមួយមិត្តភក្តិទៅវិញ។ ឪពុកនិនឮថាកូនជាប់រវល់ក៏មិនសូវហៅរកទេ។ ឯគំនិតវិញ ឆ្លៀតពេលទំនេរពីការសិក្សា គេតែងជួយឪពុកមា ហើយបានយល់ច្បាស់ពីរូបមន្តក្នុងការលាយល័ខ និងរបៀបជ្រលក់អំបោះ។
ថ្ងៃមួយ បុរសនោះមានជំងឺធ្ងន់ ហើយលាចាកលោកទៅចោលក្មេងទាំងពីរឱ្យនៅកំព្រា ដោយបន្សល់ទុកប្រាក់កាសតែបន្តិចបន្តួចប៉ុណ្ណោះ។ គំនិតប្រាប់និនថា យើងមានប្រាក់សល់តិចតួចណាស់ យើងគួរប្រកបរបរជ្រលក់អំបោះនេះបន្តទៅទៀត ទើបអាចចិញ្ចឹមជីវិតបាន។ និនប្រកែកថា ធ្វើមិនកើតទេព្រោះគេមិនចេះសោះ។ ពេលនោះគំនិតប្រាប់និនថា ខ្លួនគេចេះចាំនិងអាចធ្វើកិច្ចការទាំងអស់នោះបាន គ្រាន់តែមិនទាន់ប្រសប់ប៉ុណ្ណោះ។ និនក៏យល់ព្រម ហើយប្រឹងប្រែងធ្វើការងារតាំងពីពេលនោះមករហូតដល់បានសម្រេច។